فجاءة و بدون سابق إنذار او اعلان للعميل العزيز أنا، قامت الشركة المحترمة بتغيير نظام الاشتراك الشهرى بحيث عند استهلاك
كامل الباقة للانترنت الارضى تنخفض السرعة الى 256 كيلو بايت برغم اننى مشترك على
اساس ان السرعة هتنخفض الى واحد ميجا ودى سرعة تكفي لانجاز اعمالى.
سبنا من ان الباقة 100 جيجا استهلكت على غير
العادة فى اقل من عشرة ايام يمكن انا بقيت مسرف فى الاستخدام، و سبنا من انهم لم
يهتموا بابلاغ العميل العزيز قبل التغيير على اساس ان رأي حضرتى غير مؤثر بالنسبة
لهم اساساً. لكن اتصل بالدعم الفنى و
ابلغهم المشكلة ان السرعة اقل من المفروض يوصلنى، كانت الاجابة ما انت اللى خلصت
الباقة، طيب يا ستى انا معترف بس فين السرعة المتعاقد عليها ردت قالت هديك 250
ميجا مجانا من عندى، قلت لا انا مش طالب زيادة انا عايز السرعة 1 ميجا او سجلى
شكوى و ادينى رقمها، فكان ردها طيب نجرب الاول خطوات مع بعض يمكن تحل المشكلة قبل ما
تطلب تسجيل شكوى، قلت تمام... و بعد الخطوات المحفوظة من افصل الراوتر و راقب اللمبة و... الخ... جرب حضرتك تمام السرعة رجعت، اية اللى حصل؟- دة كان سؤالى- فكان الرد لا ابدا
الخط كان محتاج يتنشط شوية.
ساعات قليلة و كأنك يا ابو زيد ما غزيت، و
نرجع نكلم الدعم الفنى فيكون رد الاستاذ ان الانسة اشتغلتنى، و ضافت 250 ميجا و
مفيش زيادة سرعة او العودة للنظام القديم، و دى تعليمات الجهاز القومى لتنظيم
الاتصالات!!! فما كان منى الا الاتصال بالجهاز لتقديم شكوى ليكون الرد المفاجئ نعم هى
دى تعليمات السيد رئيس الجهاز.!!!
يا جماعة الجهاز من وظيفتة حماية حقوقى من
ممارسة الشركات الاحتكارية و التأكد من جودة الخدمات المقدمة لحضرتى طبقا للمتعاقد
علية بينى و بين الشركة، انتم كدة بتبعنى للشركة تعمل ما بدا لها و بتتنازل نيابة
عنى عن خدمة او ميزة انا بالفعل دافع ثمنها مقدما للشركة. ادفع ثمن خدمة لن احصل
عليها.!؟
ابعت فاكس لرئيس الجهاز، - دة كان ردها- باستغراب قلت نعم !! فاكس هو لسة
الجهاز دة بيستخدم!؟ ممكن حضرتك تدينى ايميل السيد رئيس الجهاز. لا حضرتك مفيش غير رقم الفاكس.
الجهاز القومى لتنظيم الاتصالات واضح انة ما
زال فى مطلع عام 2000 بيستخدم الفاكس و بينزل السرعة 256 كيلو بايت السرعة اللى
عفى عليها الزمن و اعتقد ان مفيش حد فى العالم بيسمع عنها غير فى مصر.
بس سيبك هتستمتع مع وى بالباقات الجديدة
الاجبارية
ليست هناك تعليقات:
إرسال تعليق